Etres projec
Etres projec
Cianton da Marevea
Cianton da Marevea l é n projet sozial nasciù tel 2019 con l zil de miorar la tecnica del ciantar e sensibilisar su la costion siriana. Te le edizion vegnude dò l percors di joegn fascegn l é mudà tolan ite no demò i ciantarins ma ence i musizisć: l é nasciù coscita na band. Fora per l istà l grop l sona da sera te le piaze de duta la val, metan dant n repertorie de cianzon internazionale e autre che vegn ca da desferente mendranze linguistiche de l’Europa. Amò apede, i joegn musizisć fascegn i à tout part te projec soziai che à dat l met de crescer sot l pont de veduda personal e musical.
Circen Dolomites Festival
L festival de circo più aut de la Talia se sporc al gran publich con performance da trar l fia che encanta duc, gregn e picoi. Del 2019 la pruma edizion, da enlouta le Dolomiti se trasc ite i guanc da festa, artisć da dut l mondo porta dant soe art te paladine naturale logade ti ciantogn più bie de le Dolomiti UNESCO.
Un Festival che se trasc fora de anter degra a sie trei temes aut, marevea e ambient. Trei desche i trei zogn zipié fora da le Trei Torn del Vajolet te nosc logo:
A-M-A
AUT: i spic di monc i va dò le proiezion verticale de le art del circo
MAREVEA: l circo e la mont te roba l cher e i te fasc doventar endò bez
AMBIENT: l maraveous teritorie de Fascia che doventa paladina evocativa e spazie de enrescida artistica
L grop de caranta joegn volontadives l é l anema de chest event. Temp, gaissa e capazità vegn metude a la leta fora per dut l an de organisazion. Na part del mestier revarda ence la tutela de nosc ambient da mont tras azion de sensibilisazion, l Circen Festival l é belapontin zenrtificà Eco Event Trentin PRO.
Chiò l link al program di evenc
Fora! La neva escape room te Fascia
Enjignà vesc pensieres e voscie abilità, didave un col auter per passar sorafora enignmes e endoign particolares che ve fajarà ruar a vosc zil: jir FORA da la combra! Pissà fora de anter e meteve en jech con vesc compagnes de cambra!
"Vera Room"
1915, Gran Vera, ve troade te na prejon sul front talian-austroungarich te le gramole del nemich. Arede demò n’ora per mudar vosce sort, dorà miec che podede vosce abilità e no ve desmentià de star adum che la forza la vegn dal grum!
Per info: Fora!
J4J - Joegn per la Jent
L Maśia
Pech sora Chiusel, pec kilometres dant del Jouf de Ciareja, se troa n post maraveous dal pont de veduda naturalistich e storich, che à inom “L Maśia”. Te chest gran teren, pech cognosciù, sul tegnir de l’ASUC de Vich, l’é na picola tieja, ades vegnuda jù, che acà egn la vegnia dorada per meter ite l fèn seà ti prees del Maśia. Per viventar la mont de Vich, INOUT, ensema a l’ASUC de Vich, l Comun de Sèn Jan, la Risola, la Rete de le Reserve del Comun General de Fascia, la Scola Ladina, l’à pissà de se tor sù l’empegn de far fora la tieja e dar nef luster al Maśia, co la volontà ence de recognoscer so valor dal pont de veduda naturalistich e ambiental,e so potenzial sozial e turistich. I joegn de Fascia i metarà man en pruma persona a chest projet: la gaissa e le idee de le neve generazion le sarà l sedim sun chel che l Maśia podarà nascer endò da nef. I joegn à fat n studie su la storia de chest lech che se troa pech sora Chiusel. Fotografia, scienza, droni, recostruzion 3D, testimonianze, storytelling l é stat i varesc de l grop de bec fasegn. N percors che part da le reisc de-L Masìa e seghita anchecondì co na volontà viva de viventar chest lech tel respet de so tradizion.
Da ades inant se é do a lurar co le istituzioni acioché l bait del Maśia posse viver endodanef fajan su l bait te l respet de so identità e cultura.