Archivie di projec
Archivie di projec
2022
sCOOP
N viac fora per le coprative de Fascia che à dat l met a bec e beze de descorir l mond de la coperazion. Da Fascia al Blegio aut per cognoscer don Lorenzo Guetti, e sinamai te la Germania do a le pedie de Friedrich Raiffeisen.
Vertical
Tel ambit de la rassegna de sport Vertical FFB Fiemme Fassa Biois, l staff de Inout à didà a l’organisazion de la tapa de vertical che partìa da Piaz de Comun de Sèn Jan e ruà a la stazion sunsom de la Gabina de Bufaure. A la garejada à tour part più o manco cent atlec, e dapò l event l é jit inant con n pasta party te utia, musega de la band “Cianton da Marevea” e jeghes organisé per i più picoi.
Tangle
En ocajion de la giornata internazionala contra la violenza su la femena, en jebia ai 24 de november del 2022 al teater de l’oratorie de Poza, l’artista e jogoliera Francesca Poppi à prejentà “Tangle - Tel gremen de na jogoliera”, n spetacol de reflescion su la femena, prejentà a la comunanza e a le clasc de la scola auta.
Space
Spazie - Space- Spazio, no se capescel jà coscita? I bec fassegn à so post per condivider momenc e crescer dessema. N lech per se veder, ciacolar e grignar. N spazie che lascia fora l conzet de lech fisich, ma che ge va do a i joegn enstesc, chest Space l é so.
Mostra Saon
Na mostra scientifica metuda dant dai bec de la scola auta Scola Ladina de Fascia su le bole de saon, n jech per bec che doenta strument per spiegar i conzec de la matematica. Anter sale interative, jeghes col saon e “rompicapi”, n percors che spiega la matematica e la fisica tras l jech e l divertiment.
Mostra Enrosadira Museo
Na regoeta de opere del artist fascian Giuseppe Soraperra metuda fora al Museo Ladin de Fascia, e inaudada endana la quarta edizion del Circen Dolomites Festival. Cadres che fegura le Dolomiti tel moment de l’Enrosadira, na combinazion de pomaranc, chécen, resa e violet che colora i monc al crepar e al fiorir del soreie.
Talent Lab
N cors de formazion de social media management per joegn endrezà ensema a la Sociaz Culturala Antermoa. Strategia e pianificazion per far garatar polito la comunicazion digitala. Emparar neve robe per n davegnir che ge dasc semper più larga al online.
2021
L Maśia
I joegn à fat n studie su la storia de chest lech che se troa pech sora Chiusel. Fotografia, scienza, droni, recostruzion 3D, testimonianze, storytelling l é stat i varesc de l grop de bec fasegn. N percors che part da le reisc del Maśia e seghita anchecondì co na volontà viva de viventar chest lech tel respet de so tradizion.
Colaborazion comun
Luron dessema al Comun de Sèn Jan per realizar co noscie atività soziale picoi lurieres de art che meton fora via per l an te le picole ciasete de legn che viventa i festii de l paìsc de Vich.
Mostra scientifica Play
Ti meisc de messal e aost le scole popolare de Vich le à ospità la mostra scientifica PLAY!, na mostra interativa e outa a tor ite i vijitadores te la interazion con picoi jeghes e esperimenc scempies. Te le sie setemane te chele che la é stata verta, à vijità la mostra beleche 2000 persone, ghesc’ e jent dal post.
Al projet à colaborà joegn del teritorie pascioné de scienza, che i à tegnù verta la mostra per l publich e i lo à vidà te la vijita.
PLAY! la nasc da n projet del Laboratorie de comunicazion de le scienze fisiche de l’Università de Trent, e la e stata fata fora da Level Up, joena Start up trentina, e metuda dant sa Vich de gra a la colaborazion con Inout e col Comitato manifestazion Vich Events.
Jump out the web
Inout, col sostegn del Piano joegn La Risola, l’à endrezà tel 2019 l projet Sutar per aria, che l’é seghità tel 2021 desche Jump out the web, n’ocajion per proar atività sportive desche l parkour, la slack line e l’acrobatica, e per proar a scombater ensema a le familie l problem de la dipendenza dai strumenc digitai, semper più sparpagnà te anter i adolescenc, mascima dò i tempes de lockdown. L projet l se à serà sù co na colaborazion col Deejay Daniel Liberatore per la realisazion de n video dance de riflescion su le dipendenze, tout jù sun Vael.
Giocolab
Full immersion circense per bec e beze endana la setemana del Circen Dolomites Festival 2021. I joegn i à tout part a laboratories con jogolieres de nonzech e i à vedù i più bie spetacoi del Festival de le Dolomites de Fascia te posc’ da marevea, compagné dal staff de animatores de Inout. N projet de Circensema, per arvejinar le neve generazion a l’art del circo e a soe desvalive forme.
Cianton da marevea 2021
L percors de “Cianton da marevea” va inant con soa terza edizion, per ge dèr l met ai joegn che fora per l 2020 à podù se cognoscer dal pont de veduda artistich e tachèr a ciantèr e sonèr ensema, de jir inant col percors de formazion e arjonjer mingol a la outa na autonomìa artistica. Apede al percors de formazion de ousc e strument, se à pissà ence de endrezèr scontrèdes con n fonich per emparar a cognoscer la doura de i impianc audio, e chest an l repertorie l’à tout ite neve cianzon per ladin e per lengac de le autre mendranze linguistiche europeane. Endana l’istà l grop de Cianton da marevea l’à sonà desvalive aoute te duc i paijes de la val, con n gran aprijiament da man di comitac manifestazion e del publich.
Deejay al museo ladin
La Coprativa Sozièla INOUT, en strenta colaborazion coi esperc etnografics e informatics del Museo Ladin, porta dant per l’aisciuda 2021 l projet “Deejay al Museo Ladin”, che perveit la realisazion de n video promozional del Museo Ladin e de soe sezion sul teritorie. L projet l perveit la registrazion de n filmat de zirca trei carc de ora, che posse ge dar luster a la strutura del Museo Ladin, a na vida inovativa e percacenta, col coinvolgiment de n bel grop de joegn e sociazion del teritorie. Duc i filmac i vegn compagné da la mùsega feruscola del deejay fascian Daniel Liberatore, recognosciù anter le neve generazion desche un anter i miores sonadores de console deejay che aon sul teritorie.
L video l’é online al link https://www.youtube.com/watch?v=8Mn1B1_UQ9g
2020
Mans da tera
N liber de contie per joegn, scrite per ladin da Sebastiano Dorich, Stefano Riz e Thomas Zulian, co le ilustrazion de Fabian Mosele e la grafica de Emma Segat. L conta a na vida gustegola le giornade di trei protagonisć Carleto, Pina e Flip, portan dant ence valch reflescion su l tem de l’ambient e de sie stravardament. Mans da Tera l’é stat realisà col didament de l’Union di Ladins de Fascia e col sostegn del BIM Adesc. Chiò l link a l’audio-liber de Mans da Tera, fat en colaborazion co l’Istidut Cultural Ladin e viventà da le museghe de Tommaso Dondio.
Cianton da Marevea
N percors out ai joegn fascegn acioche i posse miorar sia tecnica tel sonar n strument e tel ciantar. Pissà e metù dant da le joene musiziste Mery Locatin, Melany Locatin e Sabrina Calligari, col didament di Servijies Linguistics del Comun General de Fascia. I corsc i é stac tegnui dai joegn maestres fascegn Samantha Pederiva per la ousc, Alex Pederiva per la chitara, Filippo Chiocchetti per l bas e Tommaso Dondio per la bateria, col zil de far sù neve band. I joegn che à tout part a Cianton da Marevea i à portà dant i resultac de sie percors percacent endana l’istà del 2020 te le piaze de Fascia, con n repertorie de sonade internazionale e cianzon toute cà da la produzion de desvalive mendranze linguistiche europeane.
Radio Stadio Deejay
Radio Stadio Deejay l’é stat metù sù ensema a Mattia Valentini, Thomas Lozzer e Daniel Liberatore, col sostegn del Pian Joegn de Fascia e col didament di deejay de Radio Studio Record, de Annis Zeni, Giorgio Pedron e Elisa Salvi. I bec che à tout part à podù emparar a dorar la consolle e se sproar desche deejay radiofonics. Tel 2021 se perveit de seghitar l percors con scontrade sul public speaking, su la radiocronaca de evenc sportives e sul lengaz di social network.
Mostra Fake - Fai e gabole de la vijion umana
Percors espositif scientific, creà da la Start up de fisics del trentin Level up en colaborazion co la Scola Ladina, INOUT e l Comitat manifestazion de Vich, metù fora ti meisc de Messal e Aost 2020 te le scole populare de Vich. Sofia Lastei, Irene Florian, Vincent Stambé e i trei frades Enrico, Fabio e Gabriele Bernard, joene guide fasciane pascionade de fisica, i à prejentà la mostra Fake! a passa mile persone, che segur à podù aprijiar le maravee de nosc aparat visif, apede a sie gabole.
Event Lab
Laboratorie de formazion col zil de crear n staff enjignà a la promozion de evenc e scomenzadive. I joegn partezipanc à tout part a n percors formatif su Social network, Marketing, Merchandising, Video making, per esser bogn de crear contegnui multimediai e de promozion per l Circen Dolomites Festival. Endana l festival, i tousc e le touse de Event Lab i à tout part a l’endrez de duc i evenc.
Attraverso Vaia - Tras Vaia
N laboratorie de fotografia metù en pé da Davide Baldrati de la Sociazion Antermoia, col didament de Francesco Detomas e l sostegn del Comitat Festa ta Mont. I joegn che à tout part al projet à realisà fotografie che testimoniaa le conseguenze del tormen Vaia sul teritorie de Fascia e de la Val de San Nicolò. Le fotografie le é state metude fora te na mostra a l’averta te Val de San Nicolò, enaudada en ocajion de la Festa ta Mont 2020, e le é state ence binade ensema te n picol libret, che l vegnarà dat fora endana l 2021, canche vegnarà endrezà valch serada giusta a pontin.
2019
Neif gallery
Galarìa fotografica sul tema “Sport e Neif”, te la sèla de la Galarìa Zivica de Moena, en ocajion di Mondiai Junior de Schi 2019 te Fascia.
La neif…cistà
N domesdì de jeghes e fèr da mat per bec e jogn col marchie “SnowKidz Awards”, pissà ensema al Comitat de Endrez di Mondiai Junior de Schi 2019 te Fascia.
Fradaa Fascia - Tera Sènta
Fradaa internazionèla, endrezèda ensema a la Fondazion Giovanni Paolo II de Firenze, olache families fascènes à podù dèr alberch a sie jogn de Gerusalem.
Aisciuda ladina 2019
Domesdì de jeghes e animazion delaite de l’Aisciuda Ladina 2019, metù en esser ensema a l’Ufize linguistich del Comun General de Fascia e a la Scola Ladina de Fascia.
J4J - Joegn per la jent
Cater seres-event endèna via l’uton del 2019, con protagonisc’ jogn talenc fascegn e ghesc’ ecezionèi.
Cianton da marevea
Percors de tecnica del ciantèr e sensibilisazion su la question sirièna, co la colaborazion de la maestra Samantha Pederiva, la Gejìa de Poza, la Fondazion Giovanni Paolo II de Firenze e col didament del Piano Jogn de Fascia La Risola.
Sutar per aria!
Cors de acrobatica e parkour, con scontrèdes de riflescion su la dipendenza da video games. Col sostegn del Piano Jogn de Fascia La Risola, la Scola de Circo Bolla di Sapone e la Cooperativa Sociale Le Rais.
2018
Teanter
N percors de improvijazion teatrèla e sensibilisazion sul problem del Jech a Pegn, col didament del Piano Jogn de Fascia La Risola.
L circo di talenc
Spetacol teatrèl per ladin con più de 60 bec piens de talent, portà dant delaite de la rassegna de Teater Ladin del Comun General de Fascia.