Neves projec da INOUT e La Risola!

Per l’uton del 2019 INOUT, tras l pian per i joegn de la Risola, la porta dant doi neves projec per nesc joegn!

CIANTON DA MAREVEA

N percors fat de lezion con ensegnanc profesionisc’ per ciantar miec e dapodò meter ensema n spetacol de musega sul tem de la Marevea. L spetacol l vegnarà raprejentà chest uton na outa te Fascia e na outa a Firenze e vegnarà tout sù bonamans. Na ciantia de solidarietà!

suton.jpg

SUTON PER ARIA

A suton per aria i bec podarà emparar a far evoluzion e acrobazie, parkour e ciampilote, con doi dis de full immersion a Trent per emparar l’acrobatica. Apede chest sarà ence scontrade de sensibilisazion su la dipendenza da videojeghes, e i bec i endrezarà n spetacol per mosciar a la comunanza che che i à emparà de nef, e per far sutar per aria i pericoi de na dipendenza.

cianton.jpg

Averte le enscinuazion a Cistà 2019!

INOUT, col didament di Comuns de Cianacei, Ciampedel, MAzin, Sèn Jan, Soraga e Moena e co le Gejie de Fascia, porta dant per l secondo an l projet Cistà: MULTI CISTÀ 2019.

La scomenzadiva, outa ai studenc de le clasc 2° e 3° de le scole mesane e de le clasc 1° e 2° de le scola aute, la durerà sie setemane, dai 15 de messal fin ai 23 de aost, dal lunesc al vender, da le 9.00 a le 16.00, con oraries che podarà mudar respet a le atività de la giornada. La senta sarà l’oraorie de Poza.

Endana le ferie da d’istà Cistà l ge sporjerà ai bec l met de se goder, emparar, strenjer neves leames de amicizia con joegn de duta la val. Vegnarà endrezà jeghes, laboratories, raide sul teritorie e autre sort de atività, culturale e de spas, sul tem de la multiculturalità. Tel program, setemana dò setemana, sarà momenc aposta per far i doeres de scola.

Le familie enteressade podarà enscinuar i fies chiò sul sito de INOUT, dant di 15 de oril. Responaron co na mail de conferma e col codesc del cont olache far l paament de la quota. La quota de enscinuazion l’arà da vegnir paada dant che passe 10 dis da la domana de enscinuazion.

L cost l’é de 380€ (680€ per i bec che no à residenza te Fascia). Per rajon de endrez l cost l sarà medemo ence se l joen l podarà tor part a CISTA’ per n temp più curt de le sie setemane. Vegnara fat n rebas del 20% per chi che enscinuerà ence n secondo fì a la scomenzadiva. La quota la tol ite la marena (cojinà col didament di bec), l’assicurazion, i materiai, e dute le atività. Le familie cognarà se cruziar de far ruar i bec vigni dì a l’oratorie de Poza, o te i autres posc’ olache podessa scomenzar la giornada de CISTA’. Se cruziaron de far tacar e fenir le atività coscita che i bec i posse ciapar le coriere de la Trentino Trasporti.

Per problemes o autre informazion podede scriver a la mail inoutfassa@gmail.com, o chiamar i numeres 331 8424531 o 349 6491192.

0001.jpg

L Circo di Talenc

Inout à tout part a la rassegna de teater ladin de l’uton 2018, endrezada dal Comun General de Fascia, col spetacol “L Circo di Talenc”.

“Dolfo e Catina, fies de Tone dal Talent, i dezide de meter endò a jir l gran Circo di Talenc, serà e arbandonà dò la mort del pare. 
N viac te anter duc i continenc doventarà per ic l’ocajion per cerir artisć da marevea e de gran nonzech. Sun paladina ruarà ence personajes mingol particolares, che ne dajarà l met de refleter sul bel e sul valor de la desvalivanza.”

Più che 60 joegn da Fascia e da Fiem i à ciantà, sutà, balà, i se à mateà col balon, i à pedalà e jocolà te n jir e vegnir de emozion a dò a dò.

N event pissà per meter en luster i maraveousc talenc di joegn che à endrezà, scrit e portà dant l spetacol. Spetacol che l’é stat aprijià da la comunanza duta, co le doi repliche di 9 e 11 de November, a l’oratorie de Poza e a la Gran Ciasa de Soraga, che à vedù sale piene e batiman generousc.

circo talenc2.jpg

Circenlab

Na neva scomenzadiva da INOUT: Circenlab!

L grop fascian de jocolieres Circensema, adum co la sociazion INOUT, porta dant l prum CircenLab, n laboratorie de introduzion a la jocoleria per i joegn dai 13 ai 18 egn. La sentadel laboratorie sarà la palestra de le scole populare de Vich, olache bec e beze podarà jiar con ojec da trar per aria o da meter en equilibrie. Coi jomelins Martin e Thomas Pederiva, jà belebon esperc per chel che revarda l jocolar, joegn curiousc e engaissé i podarà proar a dorar balote, clave, malans, bale, e autre art del jocolier.

La pruma scontrada de introduzion la sarà sabeda al 1 de setember da le 16 a le 18:30. Dò vegnarà na full-immersion, con 24 ore de workshop e jeghes, da le 16 de jebia ai 6 de setember fin al domesdì de la dì dò. Se cenerà e dormirà te l'oratorio de Vich. CircenLab l fenirà la sera di 19 de setember con na scontrada te anter i neves jocolieres e l grop de Circensema, che endana chest an passà l'à podù se portar dant te n muie de ocajion ai ghesc' e ala comunanza de Fascia.

I neo-jocolieres più engaissé podarà dapodò seghitar so percors e doentar part del grop de Circensema, tolan ence part ai spetacui de l'uton 2018.

L cost per se enscinuar, che l scuerc la compra di materiai e de la speisa per la full immersion, l'é de 25€ per om, per n massimal de 20 persone.

No l'é amò ora de scola, l'é ora de CircenLab: n'ocajion per se meter a la proa, se goder, cognoscer neves amisc e se arvejinar a n mond gustegol e tecniche dute da descorir.

Per autre informazion:

Martin Pederiva: 3318424531

Thomas Pederiva: 3246836337

placat circenlab.jpg

Cistà 2018 l'é fenì

La é fenida con na bela serada, ensema ai genitores di joegn che à tout part, la pruma edizion de Cistà, l projet per l'istà di joegn fascegn.

Endana la sera l'é stat da grignar, ma ence momenc de riflescion enjigné dai bec, più avisa per chel che revarda l tem de le dipendenze.

L'é stat chisc i ultimes momenc de condivijion a la fin de n percors che à lascià encontenté i animatores e l'endrez de la sociazion INOUT, ma ence le familie e i 55 bec, bie emozioné endana duta la sera.

Le 6 setemane ge à dat l met ai joegn de far tante neve esperienze, de star adum e strenjer neves leames, de cognoscer da vejin le sociazion de volontariat de la val e de esser de utol con atività de valor sozial. N barat te anter comunanza e Cistà; na comunanza che à scialdi sostegnù l projet e che la ge é stata apede a chest grop de joegn. Ic, da man soa, i à volù desmostrar de aer dute le potenzialità che serf per doentar zitadins del davegnir con coscienza. Chest l'é chel che Cistà proa a ge dar de retorn al teritorie, n grop de joegn en consaputa de sie talenc, sie responsabilità e del valor del far ensema, delaite de n grop.

L detalpai de INOUT l va a duc i partner, istituzions e privac, a dute le sociazion che se à metù a la leta e le à lurà ensema ai joegn de Cistà, a dute le persone che a na vida o l'autra le à didà percheche l projet l jisse dalvers, a le familie che à dat fiduzia a n grop joen e che ne à dò e dò dat so didament, ai animatores, e a duc nosc bec che à tout par a Cistà endana cheste sie setemane, i ne à desmostrà che se cogn creser te ic, ajache i é bogn de reter più de chel che i ciapa.

cistà2018 vael

Spetàcol de TEAnTER

IMG_1781.JPG

Per domenia ai 22 de oril l grop de TEAnTER à endrezà l spetàcol "Teanter jech e risech", olache i joegn podarà mosciar a la comunanza che che i à emparà te chisc doi meisc de scontrade con esperc de teater e de art dramatiche, tras n spetàcol pissà da ic e che à l zil de sensibilisar la jent sul tem del jech a risech.

Ve speton duc en domenia ai 22 de oril da le 20:30 tel teater de l'oratorie de Poza!

Sera de prejentazion de Cistà

Vender sera te oratorio de Poza aon podù prejentar Cistà tedant a n muie de jent, genitores e bec. No spetaane n sci gran ejit, talpai a duc chi che é vegnù a ne scutar!

E endana che speton vosce enscinuazion noi jon inant a endrezar Cistà...

Sotite enveze podede scutar l'intervista che Biancarosa à fat a Matteo e Stefano per l Codejel de Radio Studio Record, olache aon podù n mingol rejonar de Inout e de Cistà. N gran detelpai a Biancarosa, Radio Studio Record e a chi che ne à scutà!